是咁的，最近一個由牡丹樓推出嘅新包，引發起年輕人熱烈討論，難道係因為個包好食+抵食？非也，只因此包擁有一個非常霸氣的名號──超級隊長。

  姑勿論這個包和美國隊長有否親屬關係，牡丹樓將此名強加於「煙肉脆薯漢堡」身上，又可以將其身價三級跳，亦可吸引好奇心旺盛的8、90後一探是否咁「超級隊穿牆」，某程度上可謂非常有腦。

  上星期三，喜愛探新獵奇嘅我放棄咗食開的吉嘢家多汁牛飯，走咗去屋企附近的牡丹樓。

  「唔該畀呢個超級……超級……」

本身口齒伶利嘅我竟然喺「超級隊長」面前如此不濟，我指住餐牌，口中卻講不出下半句。

  「哦，你要包定餐呀？」收銀姐姐（其實是嬸嬸）明白我的難處，看情況似乎我並非第一個叫不出隊長大名的人。

  我要了一個餐，加大先換到洋葱圈，但除咗可樂杯大咗，冰多咗外，洋葱圈份量比不加大的中薯條更加少，最後盛惠三十五個八，衝破我一人進食老麥的記錄。

  此時我再出示「勿落會」會員證，收銀姐姐表示今個月有細薯條送。我暗喜，誰不知這其實是一個澱粉質×4的陰謀。

  我愉快地找到一個Mc cafe的靚位，將洋葱圈和薯條交替進食，吃完這個由兩樣澱粉質結合的組合後，把隱藏「超級隊長」的盒子打開，一直保持神秘的隊長終於赤裸裸的和我打招呼。話說回來，自從牡丹樓棄用包裝紙改用紙盒後，膠登已少了出現「理想與現實」對比圖。

  我抱起隊長，咬一口，只有包皮, 咬兩口, 依然只有包皮，我正奇怪為何咬極也只有包皮味時，竟發現原來隊長的「心肝脾肺」已紛紛由底部出走……為制止這一「大逃亡」，我即時一手拿著包皮，一手有托塔天王般托著隊長屎忽般防止泄漏，場面有夠狼狽。此時手上充滿黏液的我已經不知道自己在咬些什麼，連什麼薯餅什麼肉什麼汁已經傻傻分不清，一心只想快快離開。但偏偏好死不死有對母女突然來到我對面坐低……何解有咁多位唔坐，偏要坐我對面？難道有心要欣賞我被隊長玩弄的一幕？我不明白，我亦不想明白。

  最後又是時候總結一下：在這一澱粉質滿載的套餐裡，包含咗六碗飯的熱量……不，我還多了一個細薯，即是足足七碗飯的熱量！相信經過此次隊長的洗禮後我的肥膏定必成長不少，但無所謂，反正我對非即時性出現的問題不會太上心。然而我口內的飛滋，卻已經有如黑色三連星一樣，即時由三粒連成一粒……嗚呀！