要數香港嘅特色街頭小食，雞蛋仔理所當然係其中代表。

每次放學一出門口，就有一個年約六十嘅阿伯拉住架車仔，一路唱住馬小玲一路將蛋漿倒入模具之中，不消一會，新鮮熱辣的雞蛋仔就出爐了。

  當年煤氣爐在街邊車仔檔中可能重未普及，阿伯的雞蛋仔使用炭爐製作，佢將一個個貌似蓮藕的煤放入火爐內，在小學雞時代的我看來並非了不起，但喺呢個買少見少嘅年代，炭爐雞蛋仔竟然逐漸成為一種特色賣點，實在唔知講乜好。

  我認為一底完美嘅雞蛋仔，要符合飽滿、粒粒層次分明有蛋香但又唔好死甜幾項主要條件，方為質優之選，而「馬小玲阿伯」就做到呢一點，絕對唔似得而家某些「UP耷」商場嘅不知名小食店，佢哋所賣嘅雞蛋仔，十蚊兩底睇落好平，點知一落口咬落去重脆過薯片。俗語有云「金玉其外，敗絮其中」，計我話連敗絮都不如，就咁得個殼咬空氣咩？FAIL！而且為咗滿足香港人多變嘅口味，咩朱古力又綠茶又芝士嘅口味相繼出現，真係完全唔明點解而家食乜都要落一堆調味料，計我話要食就始終原味最好，其他唔使預我。

  另外由於賣雞蛋仔的車仔檔總會有格仔餅一同出售，而阿伯賣格仔餅嘅手法又非常有彈性，見你手頭緊時可以只賣半底畀你過過口瘾，多多要求嘅我總會叫阿伯落多少少煉奶同花生醬。那種一咬落去又甜又鬆軟的口感，也使人感受到車仔檔賣的不只是人情味，也是一種回憶。

  重要的是，只要吃到阿伯嘅雞蛋仔同格仔餅，上堂時所積累嘅倦意，都即時一掃而空了。