行行下街，只要一聽到《藍色多瑙河》旋律，就知道有雪糕車喺附近。

對於身為OK軟雪糕常客嘅我來講，自然會少幫襯價格比較貴嘅雪糕車，但話說起來，其實雪糕車都曾經帶畀我一次小學雞時代嘅深刻回憶。

 想當年重住喺元朗時，某日元朗廣場正做緊屯門醫院嘅宣傳，通常呢啲宣傳又總會整啲攤位遊戲派下食物吸引下人流。而嗰次負責食物嘅，就係富豪雪糕車。

 要知道雪糕車所賣嘅種類不外乎四大種類：雲呢拿軟雪糕、甜筒、蓮花杯和橙冰，但當日唔知係咪因為免費嘅關係，只得一款雲呢拿軟雪糕供應。作為免費愛好者的我，無視前面水蛇春咁長條人龍，期待嘅心情亦足以抵消一個小時的苦候。但隨住每分每秒流走，我感覺前面人數不減反增，原來啲師奶見到啲朋友排隊就插隊插埋入去。雖然如此惡劣行為就發生喺面前，但話晒當年自己只不過係一個弱勢的小學雞，所以都只能敢怒不敢言啦。

等呀等呀，終於輪到我了。只見雪糕阿叔唧兩唧再送到手上，因為是免費雪糕，我喺現場足足用咗三分鐘去細心欣賞，赫然發現雪糕的屎塔形狀，竟然比起平日OK食開款式的形態更美。為免破壞其美感，我並未立刻放入口品嚐，亦無用傻瓜機留下其倩影。呢短短的三分鐘，可以說是我思緒最安穩的時刻，手上屎塔形狀的免費雪糕，是我那天看過最美好的東西。

我的思維仍然沉醉中，忽然感覺到手上一股涼意──噢拂夭！只見本來完美的雪糕已融得不似塔形，我本能反應下立即唔用眼改用口去舐落去。一舐，哇！流質的！好明顯加咗好多水──這就是當年免費富豪雪糕的真相。

直到今時今日，富豪雪糕車喺我眼中的印象已經唔係好食，抵食之類，而係成為一個香港特色ICON，雖不至於成為一個消失嘅集體回憶，但至少成班小學雞追住車跑嘅畫面已經無乜機會遇到，而紅白藍嘅雪糕車身，亦開始俾廣告商睇中，貼到成架廣告巴咁，呢啲唔知係咪顯示意識形態嘅消失呢？

重有另一樣可惜的是，就連OK軟雪糕都成為我的回憶之一了。