當你一聽到尾少女戰士死啦悶、小魔女倒你米、分家小天使等名稱，係咪即時令各位勾起一段段跟「變身」嘅回憶呢？

  提到魔法少女，細個時一放學扭開電視，一幕幕赤裸的變身畫面兼用卡就展現眼前。魔法美女蘿莉們對抗惡勢力最後得到勝利，和戰隊劇情差不多一樣的公式化，卻多了一分華麗，而各美女們的變身流程亦沿用至今，繼續在現今不少的變身動畫出現。不過好多作品與其叫做「變身」，不如話係「換裝」更貼切。因為變身所指的乃改頭換面，如果只係染個髮換件衫，戰鬥力雖然Power up，但都不能滿足變身嘅要求。對我嚟講，真正可以稱得上變身嘅只有《飛天少女豬事丁》嘅寶妮，其他作品都只算作「換裝」而已。

  呀，講到真正變身，除咗由少女變成豬嘅寶妮之外，喺《尾少女戰士死啦悶─最後星光》入面嗰三條「星光三劍俠」到底是否算真正變身，就非常值得研究了。本來為男兒身的他們〔動畫有無上裝泳衣照〕，一變身後即刻變有胸又著裙，到底佢哋算係變性定易服呢？如果係前者就係變身，如果係後者的話，我只覺得呢幾條友只係利用換衫一招，以恥力去換取戰鬥力罷了。

  至於何解魔法少女動畫變身(換衫)過程係咁詳細而且赤裸裸呢？嗱，既然片中有咁多囡囡，一眾麻甩觀眾們當然都想細看身材啦！當少女們配合音樂由頭換到落腳，最後完成再擺個Pose呢一連串動作去講畀大家知「我換完衫喇」。雖然可能變身過程喺設定上其實只係短短嘅三秒，但只要將呢三秒慢鏡重演就可以令動畫製作每集掙多成分鐘之餘，亦令不少男性觀眾熱血沸騰。相比起機械人動畫著重部機喺邊個機倉鑽出嚟多啲，男性角色換衫鏡頭更加買少見少，加上上個世紀又有幾多個想睇男人換衫吖？你估好似今時今日咁款，腐女滿天下咩！

  到底各大作品中的美少女們，佢哋係屬於「變身」定「換衫？呢曾就要有勞各位慢慢研究了。