戒指糖，小學時代女生至愛，人人都期望只要戴上呢隻戒指，就可以變身做魔法少女。

  當時魔法少女動畫數量如雨後春筍，個個一放學就衝返屋企睇變身卡通，要成為魔法少女當然要配備三神器：寶具！淫獸！換裝！而戒指糖就滿足到變身寶具嘅要求，所以戒指糖受歡迎不無道理。（有關魔法少女其他詳細，我另文再寫。）

  呢隻糖分紅色嘅士多啤梨同紫色嘅提子兩種味。話明係糖，當然含得啜得。但因為糖係會越含越細，所以一眾少女們都會作出以下選擇，就係一日未玩厭都唔肯將其放落口。未知大家會否意會到將糖長時間暴露於空氣中是多麼的黐塵，食糖時再將啲塵食埋落肚，真係名乎其實的「食塵」了。記得此舉曾令同學A個肚足足屙咗成日，搞到之後每次玩完都要好似食生果咁，要用水沖洗過先敢享用。

  至於我其實對於扮魔法少女興趣不大，買返來都純粹只為方便，貪佢可以行兩步舐兩下。但剛才已經提到呢隻糖本身好易黐塵，混和咗唾液嘅糖就更痴塵。加上因為太大粒的關係，冇耐性的我每次都只舐到一半就亂丟到枱上，不消一會便引來大量蟻哥吸食我的「二手糖」，埸面可謂相當噁心。

  除咗戒指糖之外，市面亦有另一兄弟產品──奶嘴糖，無論味道同握柄形狀都跟戒指糖差不多，其差別只係握柄上的鑽石換做奶嘴罷了。可能主產商認為女性市場不足以滿足其盈利需求，所以另外開發一款奶嘴直攻男性向市埸，但老老實實，有邊個想週街咬住個奶嘴博俾人恥笑呢？正因如此，奶嘴糖始終不及戒指糖般流行。

  兩蚊就可以一圓魔法少女夢，真是一個不錯的選擇。但如果拎呢隻戒指去求婚，下場直頭唔使諗，你一定會死得好慘。